អគ្គលេខាធិការដ្ឋាននៃ អ.ដ.ក. រៀបចំកិច្ចប្រជុំពិនិត្យវឌ្ឍនភាពការងារដោះស្រាយវិវាទក្នុងក្របខ័ណ្ឌនៃ អ.ដ.ក. និងផ្សព្វផ្សាយអំពីលទ្ធផលនៃកិច្ចប្រជុំលើកទី៧ របស់ អ.ដ.ក.
នារសៀលថ្ងៃទី២៩ ខែវិច្ឆិកា ឆ្នាំ២០២៤ ដោយបដិបត្តិតាមគោលការណ៍ដឹកនាំដ៏ខ្ពង់ខ្ពស់របស់ លោក កើត រិទ្ធ ឧបនាយករដ្ឋមន្ត្រីរដ្ឋមន្ត្រី ក្រសួងយុត្តិធម៌ និងជាប្រធាន អ.ដ.ក., លោក យ៉ម ផារ៉ូត អគ្គលេខាធិការនៃ អគ្គលេខាធិការដ្ឋាននៃ អ.ដ.ក.បានអញ្ជើញដឹកនាំកិច្ចប្រជុំជាមួយមន្ត្រីសម្រុះសម្រួលដោះស្រាយវិវាទនៃ អ.ដ.ក. ដើម្បីពិនិត្យវឌ្ឍនភាពការងារ និងផ្សព្វផ្សាយអំពីលទ្ធផលកិច្ចប្រជុំលើកទី៧ របស់ អ.ដ.ក. ដែលបានប្រព្រឹត្តទៅកាលពីថ្ងៃទី២០ ខែវិច្ឆិកា ថ្មីៗ នេះ។
កិច្ចការប្រជុំនេះ មានការអញ្ជើញចូលរួមពីសំណាក់ ថ្នាក់ដឹកនាំ និងមន្ត្រីនៃអគ្គលេខាធិការដ្ឋាន និងមន្ត្រីសម្រុះសម្រួលដោះស្រាយវិវាទនៃ អ.ដ.ក. ដើម្បីពិនិត្យ និងពិភាក្សាលើរបៀបវារៈសំខាន់ៗ ចំនួន ៣ ដូចតទៅ÷
១- ពិនិត្យ និងវាយតម្លៃលើលទ្ធផលចំណាត់ការសំណុំរឿងក្នុងក្របខ័ណ្ឌ អ.ដ.ក.
២- ផ្សព្វផ្សាយអំពីលទ្ធផលនៃកិច្ចប្រជុំលើកទី៧ របស់ អ.ដ.ក. និងទិសដៅអនុវត្តបន្ត
៣- ពិភាក្សាស្វែងយល់អំពីបញ្ហាប្រឈម និងរកដំណោះស្រាយដែលមានប្រសិទ្ធភាព សំដៅពន្លុឿនចំណាត់ការដោះស្រាយសំណុំរឿងក្នុងក្របខ័ណ្ឌ អ.ដ.ក. និងបង្កេីនប្រសិទ្ធភាពក្នុងការផ្ដល់សេវាដោះស្រាយវិវាទជូនប្រជាពលរដ្ឋ។
